Hiligaynon news: Tour packages nga magapasanyog sang turismo sa Iloilo ginapaayo na

Hiligaynon news: Tour packages nga magapasanyog sang turismo sa Iloilo ginapaayo na

By Lilibeth A. French, Tuesday 13th of November 2012

SYUDAD SANG ILOILO, Nob. 13 (PIA6) -- May mga tour package nga ginapaayo na sa karon diri nga magapasanyog pa sang industriya sang lokal nga turismo kag bangud nagsugod na pagpamaton ang Iloilo Airport sang flights nagikan sa Singapore kag Honkong humalin sang nagligad nga semana.

Si Jerry Anas, Tourism Officer sang banwa sang Leganes kag Presidente sang Iloilo Tourism Officers Association nagsiling nga isa sa mga sesyon sa tion sang 1st Iloilo Tourism Summit nga ginhiwat sang nagligad nga Hunyo 12 sini nga tuig amo ang pag-develop sang mga tour package nga magapahapos sa pagbisita sang mga turista sa nanuhaytuhay nga destinasyon kag makaganyat pa sang madamo sa probinsya.

Si Anas nagsiling nga natalana nila patahumon kag tapuson ining mga tour packages sa Nobyembre 21, 2012 sa isa ka aktibidad nga ginatawag Enhancement Tour Circuit Workshop. Magluwas sa mga municipal tourism officer, ang isa ka adlaw nga aktibidad pagapasakupan man sang mga tour operator, travel agent, kag iban pa nga tagsakdag.

Para sa segundo distrito sang probinsya, si Anas nagsiling nga nakahimo sila sang duha ka tour circuit nga ila gintawag “Artes y Kultura Tour Circuit” kag “Loco over Eco Tour Circuit”.

Suno kay Anas nakapatigayon na sila sang mock tour sa “Artes y Kultura Tour Circuit” nga magasugod sa banwa sang Leganes, sunod sa Pavia kag Sta. Barbara.

Sa Leganes, ang debosyon sang mga tawo sa ila patron nga si St. Vincent Ferrer ang iga-highlight sa tour. Ini magasugod sa pagbisita sa simbahan sang banwa; pasundayag sang Saad Festival nga isa ka selebrasyon sang pagpasalamat kag healing of faith pinaagi sa intersesyon ni St. Vincent Ferrer; walk tour sa plaza sang banwa; pagbisita sa Leganes Garden Club nga ginkilala bilang Outstanding Ornamental Plant Growers; kag sa eco-park sang banwa.

Ang panyaga igaserbe sa isa ka kalan-an sang banwa sang Pavia pagkatapos sang pagbisita sa simbahan kag mga hilimuan sang bantog nga produkto sini kasubong sang pottery kag baye-baye.

Ang atraksyon sa Sta. Barbara nagalakip sa church, museum, nagatubod nga kolor nga pula nga ilimnon nga tubi kag golf course nga ginasiling pinakatigulang sa pungsod.

Si Anas nagsiling nga ang “Loco over Eco Circuit Tour” magalakip sang banwa sang Alimodian, San Miguel kag Leon. Igapaidalum pa ini sa mock tour.

Ang Metro Iloilo-Guimaras Economic Development Council nagpreparar man sang tour package nga ginatawag “Agri- Eco Tour Circuit” nga nagalakip sa kabanwahanan sang Oton, San Miguel kag Cabatuan.

“Amon pa iga-validate ining tanan nga mga tour package kon mangin madinalag-on. Pagasuguran namon ini itanyag sa tion sang Dinagyang Festival sa Enero (We will still validate all of these tour packages if they are viable. Then we will start to offer them during the Dinagyang Festival in January),” pahayag ni Anas.

Ang “Enhancement of Tour Circuit Workshop” nga pagahiwaton sa Sarabia Manor Hotel ang ginasuportahan man sang Iloilo Business Club, suno kay Anas sa tion sang pagbisita sang government information officer sa mga lugar sang One Town One Product sang banwa sang Badiangan bilang kabahin sang People’s Day nga ginpatigayon sang Association of Government Information Officers-Iloilo sa koordinasyon sang Philippine Information Agency sang Nobyembre 6. (JCM/LAF/PIA6).



CABATUAN INTERNATIONAL AIRPORT
Cabatuan, Iloilo, Philippines

Cabatuan.com - Timeline 2012