Hiligaynon news: Kampanya batuk sa illegal recruitment ginpabaskug sa pagpirma sang MOU

Hiligaynon news: Kampanya batuk sa illegal recruitment ginpabaskug sa pagpirma sang MOU

By Lilibeth A. French, Thursday 13th of September 2012

SYUDAD SANG ILOILO, Sept 13 (PIA) -- Ang mga natungdan nga ahensya sang gobyerno ang nag-upod sa panguluhan sang syudad sang Passi, Iloilo agud labi pa nga makonkreto ang ila mga pagpanikasog padulong sa ginpabaskug kag tayuyon nga kampanya batuk sa illegal recruitment.

Ang partnership ginhimo nga pormal pinaagi sa paglagda sang Memorandum of Understanding nanday Philippine Overseas Employment Administration 6 Officer-in-Charge Rhea Glynda Calantas, Overseas Workers Welfare Administration 6 Director Samuel Madrid, DOLE 6 OIC Assistant Regional Director Salome Siaton, Tiglawas sang Commission on Filipinos Overseas nga si Manolo Tibe kag Passi City Mayor Jesry Palmares sang Septyembre 11, 2012.

Ang paglagda sang MOU ginsaksihan sang mga pumalasakup sang Anti-Illegal Recruitment (AIR) and Anti-Trafficking in Persons (ATIP) Campaign Seminar nga ginpatigayon sang POEA sa syudad sang Passi sa amo man nga petsa.

Ang mga pumalasakop ginabug-usan sang mga Punong Barangay kag iban pa nga lokal nga opisyal sang syudad kag mga kaingud nga banwa, mga manugpatuman sang laye, manunumbong, mga katapu sang Regional Coordinating Council for Child Labor, Illegal Recruitment and Trafficking sa Kabisayaan Nakatungdan kag iban pa nga tagsakdag.

Sa iya paghambal sa pagpirmahanay, si Ma. Teresa de los Santos sang POEA Workers Education Division nagsiling nga nakita sang gobyerno ang kinahanglanon para sa mas agresibo kag tayuyon nga mainugyunon nga pagpanikasog kag stratehiya agud magmadinalag-on ang kampanya batuk sa illegal recruitment gani ang convergence sang AIR program ginaduso sa mga nanuhaytuhay nga ahensya nga may kahilabtanan sa overseas employment kasubong sang mga rehiyonal nga talatapan sang POEA, OWWA, CFO, DOLE kag mga lokal nga panguluhan.

“Kinahanglan naton ang bulig sang LGUs sa sini nga kampanya. Ginsiling naton nga isa sa maayo nga ground agud sa paglansar sang away batuk sa illegal recruitment ang ginapatigayon sa mga kaumhan sa diin ang mga katawhan nga nagakinahanglan sang dugang nga ihibalo ang nagapuyo (We need the help of the LGUs in this campaign. We said that one better ground to wage the war against illegal recruitment is done in the grassroots level where the less informed folks thrive),” siling ni de los Santos.

Si De los Santos nagdugang nga ang cooperative alliance nagatuyo sa pagpasangkad sang network sa kampanya batuk sa illegal recruitment kag pagpataas sang ihibalo sang publiko sa bahin sang pagpangin-empleyo sa luwas sang pungsod partikular sa serbisyo sang gobyerno kag impormasyon nga magaproteher sa ila batuk sa illegal recruitment.

Samtang si Siaton nagsiling nga ang MOU magahatag sang ligwa sa mga responsibilidad sang natungdan nga ahensya sa pagtapna sang problema sa illegal recruitment sa Kabisayaan Nakatungdan partikular sa syudad sang Passi agud ang mga kasubong nga problema nga ila naatubang ang mapahaganhagan kon indi man madula.

Si OWWA 6 Director Samuel Madrid nagpahayag nga ang iya ahensya ang nagpakita man sang suporta sang ang kasubong nga MOU ang ginlagdaan sa San Jose, Antique upod ang mga ahensya sang gobyerno sang nagligad nga Mayo sini nga tuig nga nagdeklarar sang away batuk sa illegal recruitment sa rehiyon.

“Sa karon, ang battle cry sang POEA nagalanog sa syudad sang Passi kag sa mga palibot nga mga munisipalidad (Now, the battle cry of POEA reverberates in Passi City and its surrounding municipalities),” siling ni Madrid, dugang pa sini nga ang away batuk sa illegal recruitment indi problema sang POEA ukon ahensya sang gobyerno lamang apang sang tanan panaug sa mga kaumhan.

Bilang Tsirman sang Advocacy and Communication Committee of the Inter-Agency Council Against Trafficking, si Tibe nagsiling nga ang CFO luyag man pat-uron nga ang tagsa ka barangay, lugar kag probinsya sa pungsod ang hilway sa mga aktibidad sang illegal recruiters kag human traffickers.

Si Calantas ang nagsulit naman sang nauna nga pahayag ni Madrid nga ang away batuk sa illegal recruitment indi mahimo sang POEA nga nagaisahanon kag nagakinahanglan sang suporta sang tanan ilabi na sa karon nga ang mga recruiter ang nagagamit na sang cyber space sa pagpang-recruit sa iligal nga paagi.

Gindugang man sini nga “sa Nobyembre may yara na kita international flights kag indi naton luyag nga ang Iloilo Airport mangin exit point sang mga iligal nga ginrecruit nga OFWs (by November we will have international flights and we do not want that Iloilo Airport as an exit point of illegally recruited OFWs)”.

Si Palmares, nga nag-ako nga advocate sang programa, nagpakigbahin sang iya mga eksperyensya kon ano ka budlay ang magpabalik sa mga kasimanwa sini sa iban nga pungsod nga nabiktima sang illegal recruiter kag and indi maayo nga epekto sang sining iligal nga aktibidad sa ila natungdan nga mga pamilya.

Iya man gin-abiabi ang MOU kag nagkomiter nga pabaskugon pa ang implementasyon sang programa sa syudad.

Ang syudad sang Passi ginakabig isa sa mga OFW hub sa Iloilo nga may 2,504 ka mga dokumento nga OFW. Ang iya mga kaingud nga munisipyo kasubong sang Dingle, Duenas, San Rafael, Pototan, Lemery kag San Enrique ang balay sa masobra sa 8,000 ka mga aktibo nga katapu sang OWWA.

Si Calantas nagsiling nga ang syudad sang Passi kag ining mga munisipalidad ang wala mahilway batuk sa illegal recruitment bangud sila ang may nabalhag nga mga insidente. (JSC/LAF-PIA6 Iloilo)



CABATUAN INTERNATIONAL AIRPORT
Cabatuan, Iloilo, Philippines

Cabatuan.com - Timeline 2012