Hiligaynon news: Direkta nga pagpanakayon gikan sa Iloilo pa Hong Kong magasugud Nobyembre 8

Hiligaynon news: Direkta nga pagpanakayon gikan sa Iloilo pa Hong Kong magasugud Nobyembre 8

By Vicente W. Villavert, Wednesday 25th of July 2012

SYUDAD SANG ILOILO, July 25 (PIA) -- Halos naubos na ka-pamakal ang mga tiket sang eroplano padulong sa Hong Kong, suno sa Department of Tourism, Region6 samtang iya sini ginpabutyag nga ang regular kag direkta ng international flights gikan sa Iloilo Airport pakadto sa Hong Kong magasugud November 8, 2012.

Ginsiling ni DOT 6 OIC-Regional Director Helen J. Catalbas nga magasugud naman sa Nobyembre 9 ang international pakadto sa Singapore.

“Angot sa sini nga balita, ang DOT diri sa rehiyon, upod sa nanuhaytuhay mga opisyales sang mga talatapan sang gobyerno, business kag sektor sa transportasyon nagatingub sa pagtrabaho para mangin tayuyon ang pagluntad sang mga international flights, bangud makapaayo ini sa industriya sa turismo sa Western Visayas,” hambal ni Director Catalbas.

Suno kay Catalbas ang Western Visayas may 7 million population kag kon ang lima ka porsyento ukon malapit sa 350,000 san pupulasyon ang magabiyahe pakadto sa duha ka mga international destinations kag pabalik diri sa Iloilo “isa na ina ka makabig nga potensyal nga market para sa nahinambitan nga mga international flights”.

Ginalauman ni Catalbas nga ang mga tao sa mga kaiping nga mga probinsya ukon rehiyon magakadto diri sa Iloilo kag diri na magbiyahe pakadto sa luas sang pungsod, gani kinahanglanon gid nga igapabaskugon man ang “marketing” sa sini nga sahi sang transportasyon para sa lokal kag dumuluong nga mga biyahero, kag ganyaton man ang mga seafarers kag overseas Filipino workers nga gamiton ang ruta nga Iloilo Airport pakadto Hong Kong ukon Singapore.

Ang pletehan pa-Hong Kong nagabili sang P4,158 samtang ang Iloilo pa- Singapore- P8,247.00.

Ginsiling ni Catalbas nga bilan kabahin sang mga pagpanghanda, nagpatigayon siya sang meeting sa mga DOT accredited Hotel operators, transport companies kag tour operators agod makahimo sang tour packages indi lamang sa Hong Kong kag Singapore, apang ang pinaka-importante makahimo sang tour packages para sa mga lugar sa palibot sang Western Visayas.

“May lima ka mga tour operators gikan sa Capiz, Negros Occidental, Iloilo kag Guimaras provinces, nga ginhingadlan sa paghimo sang packages," hambal in Catalbas.

“Sa ulihi nga bahin sangtuig ukon sa temprano pa sa masunod nga tuig magporma kita sang isa ka mission team nga magakadto sa Hong Kong kag Singapore sa pag-promote sang aton mga potentials diri,” dugang ni Catalbas.

Ang hepe sang DOT 6 nga nagsiling nga ang iya talatapan upod sa Cebu Pacific nagaplano sa pag agda sa mga tour operators sang Hong Kong kag Singapore para sa isa ka ginatawag familiarization tour sa mga tourist attractions diri sa Western Visayas “agod sila direkta nga makatanyag sa ila natungdan nga mga kleyente sang bahin sa aton mga matahom kag makawiwili nga mga tourist destinations." (JSC/VWV-PIA 6 Iloilo)



CABATUAN INTERNATIONAL AIRPORT
Cabatuan, Iloilo, Philippines

Cabatuan.com - Timeline 2012